Schneeschuewanderig ufe Stouffe

Mir si es gäbigs Grüppli vo 14 Lüt gsy, wo am Samschtimorge i ds Innereriz si gfahre. Mänge vo üs het ds Eriz vom Summer här kennt, aber im Winter si no weni dert gsy.

Es het a däm 26. Jänner 2019 ordeli Schnee gha. Sunnebrand het’s wäger kene gä, aber mir si o nid nass worde. Nume vom Schwitze! Dr Poul het o die Route süferli plaanet und üs über fasch 500 Höhemeter ufe Schtouffe gfüert.

Di sybe Hängschte si vom Näbu verhange gsy, aber zur Sichle hei mer möge gseh. Ufem Stouffe-n obe hei mehr nang zu däm Ufschtyg dörfe gratuliere u d’Ussicht gniesse!

Dr Abschtyg het no es paar Abschtächer düre unberüert Tiefschnee erloubt. Wo mer wyder dunge si gsy, hei die vor Schischueu üs sogar no e Glüewii offeriert!

D’Regina, wo schüsch aube o isch cho schneeschuelouffe, isch hüür nid mitcho; mir hei se vermisst, u dr Stephan het im Gaschthof Sagi a ihre Maa Rouf, wo chürzlech leider verschtorbe-n isch, erinneret u mit üs uf ne aagschtosse.

Merci, Poul, für Dini Organisation vo däm schöne Tag!

Text: Anita Kaufmann, 27.1.2019
Fotos: Nicole Bohren, Anita Kaufmann

  • Stauffe_01
  • Stauffe_07
  • Stauffe_08
  • Stauffe_20
  • Stouffe_30

Simple Image Gallery Extended